Оғози «Андалеб-2014»

Душанбе, 18.03.2014. (АМИТ «Ховар» Ҳотами Шариф)- Бахшида ба 23-юмин солгарди Истиқлолияти давлатии Ҷумҳурии Тоҷикистон Вазорати фарҳанг дар ҳамкорӣ бо Кумитаи телевизион ва радиои назди Ҳукумати Ҷумҳурии Тоҷикистон аз моҳи март то нимаи дуюми моҳи августи соли 2014 бо иштироки ҳаваскорони санъати тамоми шаҳру ноҳияҳои мамлакат Фестивал-озмуни ҷумҳуриявии телевизионии эҷодиёти халқ «Андалеб-2014» -ро баргузор менамояд. 
Ҳадафи асосии баргузории фестивал-озмун дарёфти истеъдодҳои нав, санҷиши нерӯҳои зеҳниву эҷодии муассисаҳои фарҳангӣ, тақвият бахшидани вазифаҳои иҷтимоии онҳо дар эъмори ҷомеаи навбунёди Тоҷикистон ва дар ин замина баланд бардоштани нақши онҳо дар раванди тарбияи маънавии шаҳрвандон, бахусус насли наврас дар рӯҳияи хештаншиносӣ, ватандӯстӣ, ифтихори миллӣ, арҷгузорӣ ба мероси ғановатманди фарҳанги миллӣ ва намоиш додани дастовардҳои ҳунарию фарҳангии 23- соли даврони истиқлолият аст.
Дар айни ҳол бахшида ба ин чорабинии фарҳангӣ дар тамоми шаҳру ноҳияҳо омодагиҳо шурӯъ шудаанд. Аз ҷумла, тибқи иттилои мудири шуъбаи фарҳанги ноҳияи Ҳисор Парвиз Пӯлодӣ дар ин фестивал-озмун ҳунармандони халқӣ Комилҷон Ғаниев, Латиф Камолӣ, Одилҷон Ғаниев ва дигар санъаткорони наврас ширкат хоҳанд кард
Фестивал-озмун «Андалеб» ҷумҳуриявӣ буда, дар ду сол як маротиба баргузор мешавад.