Бардоштҳо аз Паёми соли 2013 ва татбиқи амалии он

Душанбе, 15.04.2014. (АМИТ «Ховар», Раъно Нусратуллозода).- Сарвари кишвар Эмомалӣ Раҳмон дар Паёми  соли 2013 ба Маҷлиси Олӣ зикр намуд, ки  мақсади ниҳоии мо таъмини зиндагии шоиста барои ҳар як сокини мамлакат мебошад ва итминони комил дорем, ки мо ба ин ҳадафҳои худ тадриҷан муяссар мегардем. Бо назардошти ин, ки дар соли 2030 аҳолии мамлакат қариб ба 13 миллион нафар мерасад, афзоиши маҷмӯи маҳсулоти дохилӣ нисбат ба соли ҷорӣ сеюним баробар ва ба ҳар сари аҳолӣ дуюним баробарро ташкил хоҳад дод. Аз ин рӯ, бо вуҷуди ҳолати ноустувори иқтисодиёти ҷаҳони муосир, заиф гардидани механизмҳои идоракунии низоми молиявӣ дар бозори ҷаҳонӣ моро зарур аст, ки ҷиҳати таъмини суботи иқтисодӣ ва дар ҳамин асос баланд бардоштани сатҳи зиндагии мардум ва афзоиши табақаи дорои даромади миёнаи аҳолӣ чораҳои мушаххасро амалӣ намоем. Дар робита ба ин бояд гуфт, ки дар ҳалли масоили вобаста ба таъмини татбиқи ҳадафҳои стратегӣ ва афзалиятҳои муайянгардида ҳар як фарди кишвар саҳми ватандӯстонаи хешро мегузорад.
Барои ноил шудан ба ҳадафҳои иқтисодӣ мо бо истифодаи васеъ аз дастовардҳои илм ва технология, навовариҳои истеҳсолӣ ва нерӯи сатҳи муосири ақлонӣ навсозии соҳаҳои иқтисоди миллиро амалӣ менамоем. Коркарди ашёи хом ва истеҳсоли маҳсулоти ниҳоӣ дар соҳаҳои воқеии иқтисоди миллӣ, идома додан ба татбиқи барномаҳои соҳавӣ дар бахшҳои афзалиятноки иқтисод, хусусан саноат ва кишоварзӣ, бунёд ва ба истифода додани иқтидорҳои нави истеҳсолии дорои технологияҳои муосир дар ин раванд мавқеи муҳимро ишғол менамояд.
Тавре ки дар Паёми Сарвари давлат зикр шудааст, дар замони истиқлолияти кишварамон дар соҳаҳои гуногун, аз ҷумла дар соҳаи саноати сабук, мошинсозӣ, химия, коркарди маъдан ва металлҳо, масолеҳи сохтмон ва саноати хӯрокворӣ зиёда аз 2200 коргоҳ ва корхонаи нав бо беш аз 58 ҳазор ҷойи нави корӣ ба истифода дода шуд. Агар ҳаҷми маҳсулоти саноатӣ дар мамлакат соли 2000-ум 1,4 миллиард сомониро ташкил дода бошад, соли гузашта ин нишондиҳанда ба 9,7 миллиард сомонӣ баробар шудааст.
Тибқи қарори Ҳукумати Тоҷикистон дар давраи миёнамуҳлат бунёди зиёда аз 200 корхонаи нави саноатӣ ба маблағи қариб 4 миллиард сомонӣ пешбинӣ гардидааст.
Президенти кишвар дар мавриди рушди соҳаи кишоварзӣ таъкид намуд, ки фаровонии бозори истеъмолии мамлакат, пеш аз ҳама, бо роҳи таъмин намудани тараққиёти устувори соҳаи кишоварзӣ тавассути истифодаи технологияҳои ҳозиразамон, таҳкими фаъолияти корхонаҳои коркарди маҳсулот, баланд бардоштани самаранокии захираҳои обу замин, инкишофи соҳаи тухмипарварӣ ва зотпарварӣ амалӣ мегардад ва ин имкон медиҳад, ки аҳолии мамлакат бо маҳсулоти кишоварзӣ ва бо маводи ғизоии истеҳсоли ватанӣ таъмин шавад. Бояд гуфт, ки ҳоло дар бозори истеъмолии мамлакат фаровонии молҳои озуқаворӣ ба мушоҳида мерасад.
Аз ин лиҳоз, зарур аст, ки ислоҳоти сохтории соҳа ҳарчи зудтар ба анҷом расида, дар марҳалаи миёнамуҳлат фаъолияти бахши кишоварзии мамлакат ба талаботи муосир мутобиқ гардонида шавад.