Барои сокинони Ваҳдат 845 гектар замин ҷудо гардид
Душанбе, 18.04.2014. (АМИТ «Ховар», Мавҷуда Анварӣ). — Бо назардошти афзоиши аҳолии шаҳри Ваҳдат масъалаи таъмин намудани сокинон бо қитъаи замини наздиҳавлигӣ барои бунёди манзил аз ҷумлаи масъалаҳои муҳимтарин ба шумор меравад. Бо ин мақсад тибқи қарорҳои Ҳукумати мамлакат дар давоми чор соли охир барои сокинони шаҳри Ваҳдат 845 гектар замин ҷудо карда шуд.
Ба таъкиди Президенти кишвар Эмомалӣ Раҳмон муносибати масъулона ба ин масъалаи муҳим, яъне тақсимоти одилонаи замин, дар навбати аввал ба эҳтиёҷмандон ва оилаҳои ҷавон, инчунин бунёди инфрасохтори муосири маҳалҳои навбунёд вазифаи аввалиндараҷаи роҳбарони мақомоти иҷроияи ҳокимияти давлатӣ, комиссияҳои ҷамъиятӣ ва дигар сохтору мақомоти давлатӣ мебошад.