Бунёди корхонаи коркарди нафт дар Данғара

Душанбе, 3.04.2014. (АМИТ «Ховар», Бекназари Абӯбакр). — Созишнома байни Ҳукумати Ҷумҳурии Тоҷикистон ва ширкати «Хели»-и Ҷумҳурии Мардумии Чин дар бораи сохтмон ва ба истифода додани корхонаи коркарди нафт дар Минтақаи озоди иқтисодии «Данғара» 2 апрел дар шаҳри Душанбе ба имзо расид. 
Аз маркази матбуоти Кумитаи давлатии сармоягузорӣ ва идораи амволи давлатии ҶТ ба АМИТ «Ховар» иттилоъ доданд, ки имзои созишномаи мазкур дар доираи таъмини иҷрои қарори Ҳукумати Ҷумҳурии Тоҷикистон «Дар бораи лоиҳаи Созишномаи сармоягузорӣ байни Ҳукумати Ҷумҳурии Тоҷикистон ва Ширкати дорои масъулияти маҳдуди сармоягузорӣ ва рушди «Хели»-и шаҳри Дунъини Ҷумҳурии Мардумии Чин дар бораи сохтмон ва ба истифода додани корхонаи коркарди нафт дар Минтақаи озоди иқтисодии «Данғара» сурат гирифт. 
Созишномаи мазкурро аз номи Ҳукумати Ҷумҳурии Тоҷикистон раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Қодири Қосим ва аз номи Ширкати дорои масъулияти маҳдуди сармоягузорӣ ва рушди «Хели»-и шаҳри Дунъин директори генералии он Го Жэньсян ба имзо расониданд. 
Мавриди зикр аст, ки сохтмони корхонаи коркарди нафт дар масоҳати 80 га дар Минтақаи озоди иқтисодии «Данғара» ба нақша гирифта шудааст. Иқтидори марҳилаи аввали лоиҳа коркарди 300-500 ҳазор тонна маҳсулотро дар бар мегирад. Дар панҷ соли аввали баъди мавриди истифода қарор додани корхона тақрибан 200 ҷойи корӣ ташкил хоҳад шуд. Муҳлати сохтмони давраи дуюм вобаста ба натиҷагириҳои татбиқи давраи аввали лоиҳа муайян гашта, иқтидори истеҳсолии корхона то 1,2 млн. тонна дар як сол ва ташкили то 500 ҷойи кориро дар бар мегирад. 
Ёдовар мешавем, ки ҳаҷми умумии сармоягузорӣ барои давраи аввали татбиқи лоиҳа 60 млн. долл. ИМА ва барои давраи дуюми татбиқи Лоиҳа 300-500 млн. долл. ИМА хоҳад буд.