Дастгир гардидани нашъаҷаллобон

Душанбе, 08. 04. 2014. (АМИТ «Ховар», Муқаддас Темурзода).- Аз ҷониби кормандони Раёсати Вазорати корҳои дохилӣ дар нақлиёт, шаҳрванди 32-солаи пойтахт Ҷалолиддин Наҷмуддинов ҳамчун гумонбар дар ғайриқонунӣ нигоҳ доштани маводи нашъадор дастгир гардид. Ҳангоми кофтукови шахсӣ аз номбурда 482 грамм маводи нашъадори навъи ҳашиш дарёфт ва мусодира шуд.
Ҳамчунин  сокини 18-солаи шаҳри Истаравшан Озодҷон Зокиров низ бо гумони нашъаҷаллобӣ дастгир шуд, ки зимни кофтукови шахсӣ аз ӯ 346 грамм маводи нашъадори навъи ҳашиш дарёфт ва мусодира шуд.
Аз рӯи ин ҳодисаҳо парвандаи ҷиноӣ оғоз гардида, тафтиш идома дорад.
Бояд зикр намуд, ки тибқи иттилои Агентии назорати маводи нашъаовари назди Президенти ҶТ, аз ҷониби кормандони ҳифзи ҳуқуқ соли 2012 дар кишвар мусодираи ҳашиш  48%-ро ташкил дода, соли 2013 аллакай ин нишондод ба 51% расидааст.