Даъвати Сафорати ҶТ дар ФР барои тамошои Паёми Президент ба МО

Душанбе, 23.04.2014. (АМИТ «Ховар,  Марҳабои  Азамат). —  Сафорати  Ҷумҳурии  Тоҷикистон  дар  Федератсияи  Русия   шаҳрвандони  дар  қаламрави   Русия  сукунатдоштаи  Тоҷикистонро  даъват  менамояд, ки  дар  тамошои  Паёми  ҳарсолаи  Президенти  Тоҷикистон  Эмомалӣ  Раҳмон  ба  Маҷлиси  Олӣ  (Парлумон) – и  ҶТ, ки  имрӯз,  23  апрел,  тавассути  ҳамаи  шабакаҳои телевизиони  Тоҷикистон  пахш  карда  мешавад,  иштирок  намоянд. Дар  ин  бора  намояндаи  расмии Сафорати  ҶТ  дар  ФР  Муҳаммад  Эгамзод  ба  АМИТ «Ховар»  хабар  дод. 
Мувофиқи  суханони  мавсуф,  сафорат зимни  муроҷиаташ ба  шаҳрвандон  тавзеҳ  дод, ки шабакаҳои Тоҷикистонро  тавассути  моҳвораҳо ва интернети  сафинавӣ  тамошо  кардан  мумкин  аст.
«Сафорати  ҶТ  дар  ФР   аз   шаҳрвандони  худ  ва  муҳоҷирони  меҳнатие, ки дар  Федератсияи  Русия  иқомат  доранд,  хоҳиш  мекунад, ки  баъди тамошои Паёми Президенти  ҶТ  ба  Парлумони  кишвар  фикру  мулоҳиза  ва  таманниёти худро  дар  мавриди он  ирсол  доранд», —  гуфт  дипломат.
Манбаъ  ҳамчунин  хабар  дод, ки  имрӯз  дар  толори калони  сафорат  тамошои  якҷояи Паёми Президент  ба  Парлумон  аз  ҷониби  кормандони  намояндагии  дипломатӣ,  намояндагони  вазорату  идораҳои  ҷумҳурӣ  дар  ФР  ва шаҳрвандони дигари  хоҳишманди  Тоҷикистон  баргузор  мегардад.