Нахустин журналистзани тоҷик 100- сола шуд

Душанбе, 14.04.2014. (АМИТ «Ховар», Манижа Баҳромзода).- 14-уми апрели соли 1914 Кибриё Қаҳҳорова-нахустин журналистзани тоҷик ба дунё омадааст. Имрӯз аз таваллуди ин бонуи қаламбадаст 100- сол сипарӣ гашт. Бахшида ба ин рӯзи таърихӣ имрӯз дар факултаи журналистикаи ДМТ бо ташаббуси кафедраи журналистикаи байналхалқӣ маҳфили илмӣ-адабӣ баргузор гардид ва дар он устодону донишҷӯён роҷеъ ба ҳаёту фаъолияти ин зани соҳибқалам сухан гуфтанд. 
    Сангин Гулов-мудири кафедраи журналистикаи байналхалқии факултаи журналистика  мегӯяд, Кибриё Қаҳҳорова аз дастпарварони мактаби  таҳрири  устод  Айнӣ маҳсуб  ёфта, маҳорати бузурги касбиро низ маҳз аз ҳамин ҷо омӯхтааст ва ёдоварии рӯзгори ӯро муҳим ва ибратбахш ном бурд. Дар робита ба ин Бахтиёр Қутбиддинов-дотсенти кафедраи журналистикаи байналхалқӣ иброз дошт, ки Кибриё Қаҳҳорова дар баробари  муҳаррирӣ, инчунин  ба тарҷумонӣ низ рағбат пайдо карда, асарҳои зиёдеро тарҷума карда, тавассути он миёни аҳли адаб маҳбубият пайдо намуд.
   Кибриё Қаҳҳорова 26 сентябри соли 1996 дар синни  82  чашм аз олам пӯшидааст. Тавре ки аз факултаи журналистикаи  ДМТ ба АМИТ «Ховар» иттилоъ доданд, бахшида ба 100-солагии Кибриё Қаҳҳорова-нахустин журналистзани тоҷик  китоби Мансур Суруш-адиби шинохтаи тоҷик бо номи «Қиссаи  бонуи соҳибқалам» бо 3  забон  нашр гаштааст, ки аз муваффақиятҳо ва саҳми ин бону дар журналистикаи тоҷик нақл мекунад.