Ғолибияти донишҷӯён дар Дави миллӣ

 
Душанбе, 19.05.2014. (АМИТ «Ховар», Раъно Нусратуллозода).-Ду нафар донишҷӯи Донишгоҳи давлатии Хуҷанд ба номи академик Бобоҷон Ғафуров дар Дави миллӣ, ки дирӯз дар маркази вилояти Суғд бо иштироки васеи хонандагону донишҷӯён ва тамоми кормандони соҳаҳои гуногун баргузор гашт, ҷойҳои якум ва дуюмро ба даст оварданд. Тавре ки сардори маркази иттилоот ва таҳлили Раёсати донишгоҳ Маъмури Юсуфзод иттилоъ дод, дави миллӣ аз назди майдони Исмоили Сомонӣ оғоз гардида, дар назди парчами баландтарин дар вилоят ба анҷом расид. Ҳасан Ёқубзод, донишҷӯи курси дуюми факултаи тарбияи ҷисмонии донишгоҳ ҷойи аввал ва Бобоҷони Пӯлодҷон, донишҷӯи соли якуми ҳамин факулта ҷойи дуюмро соҳиб гардида, бо туҳфаҳо сарфароз гаштанд. Барои иштироки фаъолона раёсати донишгоҳ низ бо туҳфа ва ифтихорнома қадршиносӣ гардид.
Бояд зикр намуд, ки аз Донишгоҳи давлатии Хуҷанд ба номи академик Б. Ғафуров дар Дави миллӣ наздики 4000 нафар устоду донишҷӯн иштироки фаъол дошт.