Ҳамоиши созандагони Ватан

 
Душанбе, 22.05.2014. (АМИТ «Ховар», Раъно Нусратуллозода).-Дар Донишкадаи молия ва иқтисоди Тоҷикистон бахшида ба Рӯзи ҷавонони Тоҷикистон дар мавзӯи «Пешгирии қонуншиканӣ, ҷинояткорӣ ва омилҳои ба он мусоидаткунанда дар байни ҷавонону ноболиғон» 21 май ҷаласаи тантанавӣ баргузор гардид. Дар он муовини раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Мавсума Муинова ва кормандони кумита иштирок намуданд.
Тавре ки котиби матбуоти донишкада Машҳура Абдуллоева иттилоъ дод, дар ҳамоиш муовини ректор оид ба таълим Илҳомиддин Иброҳимов иброз намуд, ки имрӯз Тоҷикистон ба ҷавонон такя мекунад ва беш аз 41% хизматчиёни давлатиро ҷавонони то 35- сола ташкил медиҳанд. 
Муовини раиси Кумитаи ҷавонон, варзиш ва сайёҳӣ Мавсума Муинова  аз рисолати ҷавонони имрӯза ёдовар шуда, зикр намуд, ки хушбахтона, имрӯз нақши ҷавонон дар пешбурди фаъолияти тамоми соҳаҳои халқи ҷумҳурӣ назаррас аст. Феълан барои ҷавонони тоҷик ҷиҳати пешрафти фаъолият ва таҳсилоти ҳамаҷониба тамоми имтиёзу шароитҳои мусоид фароҳаманд. Аз ҷумла, таъсиси квотаи президентӣ, ки барои дастгирии ҷавонони болаёқат ва имконияташон маҳдуд аз навоҳии дури кишвар барои бо таҳсил фаро гирифтани ин қабил ҷавонон мусоидат менамояд. То имрӯз 10 ҳазор духтару ҷавони кишвар тибқи ин квота таҳсилкарда ва мутахассиси соҳа шуда, дар навоҳии худ фаъолият доранд. 
Дар чорабинӣ муовини ректор оид ба тарбия Лутфия Эшонҷонова мусобиқаҳо ва озмунҳои дар муддати «Ҳафтаи ҷавонон» дар таълимгоҳ доир гардидаро ҷамъбаст намуда, иброз дошт, ки бо мақсади фаъолгардонии донишҷӯён ва тарғибу ташвиқи тарзи ҳаёти солим, нақшаи чорабиниҳои «Даҳ рӯзи ҷавонон» тасдиқ гардид, ки мутобиқи он аз 10 то 20 майи соли ҷорӣ чорабиниҳои маърифатӣ, илмӣ, фарҳангӣ ва мусобиқаҳои варзишӣ гузаронида шуданд.