Кӯҳистони Мастчоҳ: табибони касбӣ намерасанд

Кўҳистони Мастчоҳ, 21.05.2014. (АМИТ «Ховар», Гулбаҳори Худойбердӣ).-Дар ҷумҳурӣ тайи солҳои охир соҳаи тандурустӣ рӯ ба беҳбудӣ ниҳодааст. Аммо нарасидани кадрҳои баландихтисоси тиббӣ ҳанӯз ҳам дар ноҳияҳои дурдасти ҷумҳурӣ ҷой дорад. Тавре ки сардухтури беморхонаи ноҳияи Кӯҳистони Мастчоҳ Абдуамон Идиев иттилоъ дод, ҳоло дар ноҳия як маркази саломатӣ, се маркази саломатии деҳот, даҳ муоинагоҳи тиббӣ, маркази назорати давлатии санитарию эпидемиологӣ ва як дорухона фаъолият мекунад. Бемористони марказӣ имрўз дорои дасгоҳҳои рентгенӣ, ултрасадо ва озмоишгоҳи клиникӣ мебошад. Дар шифохонаи марказии ноҳия марказҳои танзими оила, ташаккули тарзи ҳаёти солим, табобати бемориҳои кўдакона ва эмкунӣ фаъолият доранд. Дар давоми сол зиёда аз 1346 нафар мубталои бемориҳои сироятӣ, аз ҷумла 1320 нафар бемории зуком ба қайд гирифта шуд. -Бо сабаби набудани духтурони баландихтисоси бемориҳои чашм, пӯст, бемориҳои занона ва бачагона мувофиқи меъёр беморонро қабул карда наметавонем,- гуфт сардухтури ноҳияи мазкур.