Ҷаласаи навбатии Клуби бозори озод

Душанбе, 24.06.2014. (АМИТ «Ховар»). – 27  июн  дар  шаҳри  Кӯлоб ҷаласаи навбатии Клуби бозори озод бахшида ба мақому аҳамияти  асосии  ниҳоди  моликияти  шахсӣ дар  амри рушди  иқтисодию  ҷамъиятӣ   баргузор  мегардад. 
Тавре  ки  аз Клуби  бозори озоди  Тоҷикистон  хабар  доданд, муайян  намудан ва тақсиму   ҳифзи  ҳуқуқҳои  моликият  яке  аз  масъалаҳои мураккабу  душвортарини ҳар ҷомеа  маҳсуб  ёфта,  бояд бо  ягон  усул  ҳатман ҳал  карда шавад. 
Низоми  қавии ҳуқуқҳои  моликият яке  аз  мафҳумҳои  асосии  низоми  иқтисодии  капиталистӣ  ба  шумор  меравад. Мунаққидони  бахши  иҷтимоии  кишварҳои  мухталиф иброз  медоранд, ки ҳуқуқҳои  «моликият» аксаран назар  ба  ҳуқуқҳои  «инсон» бештар  афзалият  доранд, ки ин  боиси  муносибату  имкониятҳои  нобаробар  мегардад. Воқеан, нобаробарӣ дар  ҳар  ҷомеа арзи  вуҷуд  дошта, ихтилофоти  тахминии  байни ҳуқуқҳои  моликият ва  инсон чизи хаёлист, зеро  ҳуқуқҳои  моликият  маънои  ҳамон  ҳуқуқҳои  инсонро  дорад.
Ҳаҷму  дараҷаи ҳуқуқҳои  моликияти  шахсӣ ба  усулҳое таъсири  сахт  мерасонанд, ки  мардум тавассути онҳо барои  таҳти назорат  гирифтани  захираҳои  иқтисодӣ  байни  худ  рақобат  мекунанд. Ҳуқуқҳои муайяну  ба таври  аъло ҳифзшудаи  моликият  рақобати маҷбуриро  бартараф  намуда, боиси  рушди ҷомеа  гардида ва  омилҳои  қавии  рушди  устувори иқтисодиётро  ба  миён   меоранд.