Бонки ҷаҳонӣ Стратегияи нави ҳамкориро тасдиқ намуд

Душанбе, 12.06.2014. (АМИТ «Ховар», Пайрави Қосим). – Стратегияи нави ҳамкории Бонки ҷаҳонӣ бо Тоҷикистон тасдиқ гардид, ки мақсад аз он вусъат бахшидани дастгирии кишвар аз ҷониби Бонки ҷаҳонӣ ва Корпоратсияи байналмилалии молиявӣ дар солҳои 2015 – 2018 мебошад.Тавре ки аз Намояндагии Бонки ҷаҳонӣ дар Тоҷикистон хабар доданд, яке аз мақсадҳои дигари стратегия коҳиш додани камбизоатӣ ва баланд бардоштани сатҳи некӯаҳволии мардум бо дастгирии се бахшҳои асосӣ мебошад.Стратегияи нав зимни ҳамкории зич бо ҳукумат, аз ҷумла, ҷомеаи шаҳрвандӣ, созмонҳои ҷавонон, бахши инфиродӣ ва сарпарастон таҳия гардид. Ҳуҷҷати нав мутобиқ бо Стратегияи миллӣ ҷиҳати баланд бардоштани сатҳи некӯаҳволии мардуми Тоҷикистон барои солҳои 2013 — 2015 таҳия шудааст. Дар ҳошияи стратегия ба коҳиш додани сатҳи ришвахӯрӣ ба манзури беҳдошти муҳити соҳибкорӣ бо истифодаи хидматрасонии электронӣ барои қонеъ гардонидани талабҳое, ки фаъолияти соҳибкориро хусусан дар бахши ҳисоботи андоз танзим менамоянд, таваҷҷӯҳи хоса зоҳир мегардад.Стратегияи нав ҳамчунин тадбирҳои оид ба афзун намудани ҳуқуқҳои занон барои замин ва дастрасӣ ба молия, ҳамчунин афзун намудани нерӯю малакаҳои онҳо ва таъмини дастрасии баробар ба хидматрасониҳои хушсифати иҷтимоиро дар бар мегирад.