Касбу ҳунар беҳ аз мероси падар

Душанбе,5.06.2014. (АМИТ «Ховар», Лайло Тоирӣ).-Таълими касбии калонсолон дар Тоҷикистон ҳамчун механизми мутобиқсозии қувваҳои корӣ ба талаботи бозори меҳнат нақши муҳим дорад. Бино ба гуфтаи сармутахассиси шуъбаи робитаҳои байналмилалӣ ва ҷамъиятии дастгоҳи марказии Агентии меҳнат ва шуғли аҳолӣ Рустамҷон Умаров феълан дар Муассисаи давлатии «Маркази таълимии калонсолони Тоҷикистон» — и Агентии меҳнат ва шуғли аҳолии Вазорати меҳнат, муҳоҷират ва шуғли аҳолии Ҷумҳурии Тоҷикистон шаҳрвандони бекор, корҷўён ва муҳоҷирони меҳнатӣ аз рўи 42 намуд касбу ихтисос ба тайёрии касбӣ, такмили ихтисос, бозомўзӣ ва шаҳодатномакунонии малакаҳои касбӣ фаро гирифта мешаванд.Дар марказ ва филиалҳои он шаҳрвандони бекор, муҳоҷирони меҳнатии эҳтимолӣ ва дигар табақаҳои аҳолӣ забонҳои англисӣ, олмонӣ, русӣ ва инчунин ихтисосҳои ҳисобчии 1 С, кафшергари газу барқ, ошпаз, харрот, дўзандаи либосҳои занона, асалпарвар, боғпарвар, барқчӣ, асосҳои компютер, назоратчии барқ, пешхизмат, сантехник, сохтмончӣ, қаннод, маъмури меҳмонхона, котиба- коргузор, сартарош, рўзгордорӣ, ташхису таъмири мошин, хизматрасонии иҷтимоӣ, устои бомпўш, чўбтарош ва ғайраро аз худ менамоянд. Ҳамчунин барои равнақу ривоҷи корҳои хонагӣ, ҳиссагузорӣ дар паст намудани сатҳи камбизоатӣ миёни занону духтарони деҳот ва рушду эҳёӣ касбҳои қадимаи миллӣ, дар баъзе ноҳияҳои дурдасти кишвар омўзиши касбҳои қуроқдўзӣ, кандакорӣ, чармгарӣ, гилему ҷуроббофӣ, гулдўзӣ, чакандўзӣ, инчунин қолинбофии дастӣ ба роҳ монда шудааст. Таҳсил дар марказ ба таври ройгон ва худмаблағгузорӣ ба роҳ монда шуда, муҳассилин дар таълимгоҳҳои ба таври муосир ҷиҳозонидашуда ба таҳсил ва таҷрибаомўзӣ фаро гирифта мешаванд. Дар айни замон теъдоди умумии марказҳои таълими касбии низоми мақомоти меҳнат ва шуғли аҳолӣ 77 ададро ташкил медиҳад, ки ин марказҳо бо таҷҳизоти муосири таълимӣ, нақша ва барномаҳои ҷадиди таълимӣ пурра таъмин мебошанд.