Суғд: 100 ҳазор сомонӣ барои бунёди мактаби нав

Душанбе, 02.06.2014. (АМИТ «Ховар, Мавҷуда Анварӣ). — Раиси вилояти Суғд Абдураҳмон Қодирӣ зимни сафар ба ноҳияи Ҷаббор Расулов дар мактаби рақами 19-уми ҷамоати Ғӯлакандоз ба бунёди бинои нави таълимӣ санги асос гузошт. Иншооти мазкур аз ду ошёна ва 17 синфхона иборат буда, барои таҳсили 400 нафар хонанда пешбинӣ шудааст. Бинои нави таълимӣ ба тариқи ҳашар бунёд хоҳад шуд. Бо назардошти ташаббуси созандаи аҳли маҳал раиси вилоят ба сокинон барои оғози чунин кори нек изҳори сипос намуда, зикр дошт, ки барои вусъати корҳои сохтмонӣ аз ҳисоби буҷаи вилоят 100 ҳазор сомонӣ маблағ ҷудо гардида, пас аз мавриди истифода қарор гирифтан, мактаб пурра бо мизу курсӣ ва таҷҳизоти хониш бо дастгирии мақомоти иҷроияи ҳокимияти давлатии вилоят таъмин мешавад.