Касбомӯзии кӯтоҳмуддат дар 565 муассиса

Душанбе, 15.08.2014. (АМИТ «Ховар», Зарангези Латиф).- Имрўзҳо дар миқёси ҷумҳурӣ тибқи маълумоти оморӣ 82 маркази таҳсилоти иловагӣ ба қайд гирифта шуда, дар онҳо дар соли 2013 — 1347 маҳфил ва ба теъдоди 46155 нафар аъзои маҳфил фаъолият намуданд. Ба иттилои Вазорати маориф ва илми кишвар дар самти таҳсилоти ибтидоӣ ва миёнаи касбӣ низ корҳои муайян ба анҷом расиданд. Дар ҷумҳурӣ 63 муассисаи таҳсилоти ибтидоии касбӣ, аз ҷумла, 56 литсейи касбии техникӣ, 7 литсейи касбии саноати кишоварзӣ ва инчунин 5 муассисаи таҳсилоти ибтидоии касбӣ фаъолият дорад. Дар ҷумҳурӣ дар зинаи таҳсилоти ибтидоии касбӣ аз рўи 106 ихтисос мутахассис омода мешавад. Ҳамзамон дар қаламрави ҷумҳурӣ бо мақсади соҳибкасб намудани шаҳрвандон 565 муассисаи таълимии давлатӣ ва хусусӣ ҷиҳати омода намудани касбҳои коргарӣ курсҳои кўтоҳмуддати таълимии 1, 2, 3 ва 6 — моҳа фаъолият менамоянд. Аз ҷумла, дар 117 мактаби таҳсилоти миёнаи умумӣ аз ҳисоби гурўҳҳои таълимии муассисаҳои таҳсилоти ибтидоии касбӣ касбҳои коргарӣ аз рўи 6 ихтисос, дар 60 муассисаи таҳсилоти ибтидоии касбӣ аз рўи 34 ихтисос, дар 10 муассисаи таҳсилоти миёнаи касбӣ аз рўи 11 ихтисос, дар 13 муассисаи таҳсилоти олии касбӣ (курсҳои кўтоҳмуддат) аз рўи 7 ихтисос, дар 291 муассисаи ғайридавлатӣ аз рўи 36 ихтисос ва дар 74 Маркази таълими калонсолон ва филиалу намояндагиҳои онҳо аз рўи 45 ихтисос мутахассис омода мешавад.