Хусусиятҳои баррасии парвандаҳо бо иштироки ВАО

Душанбе, 22.09.2014. (АМИТ «Ховар», Мавҷуда Анварӣ).- Дар Дафтари САҲА дар Тоҷикистон машварати омӯзишӣ бо иштироки судяҳои судҳои ноҳияҳои шаҳри Душанбе, шаҳру ноҳияҳои  вилояти Хатлон ва рўзноманигорон доир ба мавзўи «Хусусиятҳои баррасии парвандаҳо бо иштироки ВАО ва рўзноманигорон» ҳафтаи гузашта баргузор гардид.
Муовини раиси Шўрои адлия М.С. Қаландарзода таъкид намуд, ки яке аз омилҳои демократӣ будани ҷомеа он мебошад, ки ҳар як шаҳрванд метавонад фикру ақидаашро озодона баён намуда, дар бораи ин ё он ҳолат маълумот ва ахборе, ки тартиби ба даст овардани онро қонунгузор пешбинӣ намудааст, дошта бошад.
Аз ин рӯ, давлати Тоҷикистон озодона баён намудани фикру ақидаро кафолат дода, дар Сарқонуни худ дар моддаи 30-юм ишора намудааст, ки ҳар кас барои озодии сухан, нашр, истифодаи воситаҳои ахбор ҳуқуқ дорад.
Дар баробари ин, бо мақсади воқеан ҳам амалӣ гардидани принсипи демократӣ будани ин ҳуқуқҳо, дар ҳамин қонун кафолат дода шудааст, сензураи давлатӣ ва таъқиб барои танқид манъ аст.
 Масъалаи  дигар, ин истифода бурдани маълумоту иттилоотҳои ба дастоварда мебошад, ки тавре таҷриба нишон медиҳад, на ҳама вақт маълумотҳои паҳнгардида дуруст ва саҳеҳ ба аҳолӣ пешкаш  мешаванд, ки дар натиҷа баҳсҳои судӣ ба миён меоянд.
Баргузории чунин машварат ба омӯзишу ошноӣ пайдо намудан бо таҷрибаи байналмиллалии  марбут ба тартиби муроҷиат, ариза оид ба ҳифзи шаъну шараф, эътибори корӣ, ҳимояи шаъну шараф зимни таҳқиру тўҳмат, таҷрибаи судии баррасии ин намуд баҳсҳо, стандартҳои байналмиллалӣ, ҳуқуқ ба озодии сухан, баёни фикру ақида, ҳуқуқ ба ҷустуҷў  алоқамандӣ дошта,  бобати баланд бардоштани сатҳи касбияту сайқал додани маҳорату малакаи касбии ширкаткунандагон мусоидат менамояд.