Ҷашнвораи синамоии «Дидор» дар Тоҷикистон

Душанбе, 14.10.2014. (АМИТ «Ховар», Екатерина  Пасторова). – Ҷашнвораи  байналмилалии синамоӣ таҳти  унвони «Дидор» дар  Тоҷикистон  бо  намоиши   филми  мустанади «Комил» оғоз  меёбад. 
Муаллифу  коргардони  ин  филм   устоди  синамои  кишвар  Сафарбек  Солиев  мебошад. 
Ҷашнвораи   байналмилалии «Дидор»  бори  шашум  аст, ки дар  пойтахти  Тоҷикистон  баргузор гардида,   аз  16  то  20  октябр  идома  меёбад. 
Мувофиқи  маълумоти  роҳбарияти Иттиҳодияи  синамогарони   Тоҷикистон, дар  кори  ҷашнвора  устодони  синамои  Қазоқистон,  Ӯзбекистон,  Гурҷистон,  Озарбойҷон,  Русия,  Тоҷикистон,  Арманистон,  Эрон ва  Афғонистон  иштирок  менамоянд.
Имсол дар  ҷашнвора   номгӯи  нав – «Синамои  форсӣ» манзури бинандагон  гардида,  дар  ҷараёни он 12  филми  устодони  синамои Тоҷикистон,  Эрон ва  Афғонистон   намоиш  дода  мешавад.