Ба ҷавонони 18- сола ҳашиш чӣ даркор?

Душанбе, 10.11.2014. (АМИТ «Ховар», Лайло Тоирӣ).-Кормандони Агентии назорати маводи нашъаовари назди Президенти Ҷумҳурии Тоҷикистон дар натиҷаи як амалиёт ду нафар сокини 18-солаи ноҳияи Ёвонро, ки мехостанд дар ҳудуди пойтахт маводи нашъаоварро фурӯшанд, дастгир намуданд.Барои амалӣ намудани хабари фаврӣ қарор қабул шуд, ки онҳоро бо далели шайъӣ дастгир намоянд.Дар вақти азназаргузаронии шахсӣ аз онҳо бастаи полиэтиленӣ бо маводи растанимонанди дорои бӯйи махсус ёфт ва мусодира гардид.Озмоишгоҳи ташхиси судӣ муайян кард, ки маводи мусодирашуда навъи ҳашиш аст. Аз рӯи ҳодисаи мазкур нисбат ба дастгиршудагон парвандаи ҷиноятӣ оғоз шудааст.Онҳо ба тавқифгоҳи нигоҳдошти муваққатии агентӣ ворид шуданд.Тавре ки аз хадамоти матбуотии агентӣ иттилоъ доданд, дар айни замон гурӯҳи тафтишотӣ-фаврии АНМН тадбирҳои заруриро ҷиҳати муайян кардани дигар шахсоне. ки ба ин ҷиноят марбутанд, андешида истодаанд.