Бозомўзии масъулини соҳаи сайёҳӣ дар маҳал

Душанбе, 24.11.2014. (АМИТ “Ховар”, Зарангези Латиф).- Бо мақсади амалӣ намудани нақшаи чорабиниҳои «Барномаи давлатии рушди туризм дар Ҷумҳурии Тоҷикистон барои солҳои 2010-2014» дар шаҳри Хоруғи ВМКБ дар мавзўи «Эҳёи рушди туризми экологӣ бо мақсади беҳдошти сифати зиндагии аҳолии минтақаҳои дурдасти ҷумҳурӣ» семинари омўзишӣ баргузор гардид. Дар он намояндаи Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон, коршиносони байналмилалии соҳаи сайёҳӣ барои масъулини раёсат, бахшҳои ҷавонон, варзиш ва сайёҳии шаҳру ноҳияҳои вилоят ва устодону донишҷўёни риштаи туризми Донишгоҳи давлатии Хоруғ ширкат варзиданд. 
Ҳадафи семинар баланд бардоштани савияи дониши кормандони соҳаи туризм дар ҷодаи эҳё ва рушди туризми экологӣ мебошад. Хотиррасон бояд кард, ки имрўз ВМКБ бо манзараҳои зебои экологиву таърихӣ ва кўҳию варзишӣ ҷолиби диққати сайёҳон буда, дар айни замон дар вилоят 12 ширкати туристӣ, зиёда аз 55 адад хонаи хурд,  4 адад осоишгоҳи табиӣ, 16 адад меҳмонхона дар хизмати сайёҳон мебошад.