Иқдомҳои Ҳукумат ҷиҳати дастгирии мақомоти корҳои дохилӣ

 
Душанбе, 10.11.2014. (АМИТ «Ховар», Бекназари Абӯбакр). — Бо дастгирии Ҳукумати мамлакат тӯли солҳои соҳибистиқлолӣ таҳкурсии моддиву техникии мақомоти корҳои дохилӣ ва ҳамаи сохторҳои онҳо барои дар сатҳи баланди касбӣ иҷро намудани вазифаҳои хизматӣ бо таҷҳизоту воситаҳои муосири техникӣ, иншооти замонавӣ ва мутахассисони касбӣ мунтазам таҳким бахшида мешавад.Ин нуктаро Президенти мамлакат Эмомалӣ Раҳмон зимни суханронии хеш дар маҷлиси тантанавӣ бахшида ба иди касбии кормандони мақомоти корҳои дохилӣ, ки имрӯз дар «Кохи Ваҳдат»-и пойтахт доир гардид, иброз дошт.  
Сарвари Давлат афзуд, ки дар панҷ соли охир 60 бино ва иншооти маъмурӣ, аз ҷумла маҷмааи варзишии «Динамо», госпитали замонавӣ, маркази назоратии “Шаҳри бехатар”, бинои 5-ошёнаи маъмурӣ барои дастаи таъиноти махсуси милитсия, бинову иншооти хизматрасонӣ дар қисми низомии 3502, инчунин якчанд иншооти соҳа дар Вилояти Мухтори Кӯҳистони Бадахшон, вилоятҳои Суғду Хатлон ва гурӯҳи ноҳияҳои Рашт ба истифода дода шуда, ҷиҳати омодасозии мутахассисони баландихтисоси соҳа бунёди Академияи Вазорати корҳои дохилӣ оғоз карда шуд.
«Субҳи имрӯз боз як бинои истиқоматии навбунёд барои 50 оилаи кормандони мақомоти корҳои дохилӣ ба истифода дода шуда, сохтмони 13 иншооти маъмуриву хизматии дигар идома дорад», — иттилоъ дод Э. Раҳмон.
Қобили зикр аст, ки имсол бо қарори Ҳукумати кишвар Муассисаи давлатии таълимии «Коллеҷи милитсияи Вазорати корҳои дохилӣ» таъсис дода шуда, дар он ба таълим ва тарбияи ятимону бепарасторон, фарзандони бесаробонмондаи кормандони мақомоти ҳифзи ҳуқуқ ва сохторҳои низомӣ диққати махсус дода мешавад.
Президенти кишвар Эмомалӣ Раҳмон тазаккур дод, ки Ҳукумати мамлакат баробари таъмини шароити мусоиди хизмат ба хизматчиёну сарбозон дар самти беҳтар намудани кафолатҳои иҷтимоии онҳо таваҷҷуҳи махсус зоҳир менамояд. Бо ин мақсад, соли ҷорӣ қариб 650 оилаи хизматчиёни милитсияи тоҷик бо қитъаҳои замини наздиҳавлигӣ ва манзили истиқоматӣ таъмин гардидаанд.
Илова бар ин, тӯли 10 соли охир маоши кормандони мақомоти корҳои дохилӣ қариб 20 баробар зиёд карда шуда, ҳамчунин дар доираи амалисозии барномаи рушди милитсия дар солҳои 2014-2020 ҷиҳати ҳавасмандгардонии кормандони соҳа давра ба давра чораҷӯӣ карда мешавад.