Парлумон ба қонуни реклама тағйирот ворид менамояд

Душанбе, 12.11.2014.(АМИТ „Ховар“, Марзия Саидзода).-Интизор меравад, ки имрӯз вакилони Маҷлиси намояндагони Маҷлиси Олии Ҷумҳурии Тоҷикистон зимни баргузории ҷаласаи навбатии иҷлосияи шашуми палатаи поёнии Парлумони кишвар ба лоиҳаи Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2014» тағйиру илова ворид намоянд.  Аз Парлумони кишвар ба АМИТ „Ховар“ иттилоъ доданд, ки дар ҷаласа ҳамзамон лоиҳаи Қонунҳои Ҷумҳурии Тоҷикистон «Дар бораи маҷлисҳо, гирдиҳамоиҳо, намоишҳо ва роҳпаймоиҳо»,«Дар бораи назорати содирот», Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи берун баровардан ва дохил кардани сарватҳои фарҳангӣ», «Дар бораи реклама» ва „Дар бораи иттилоот“ баррасӣ ва қабул хоҳанд гашт. Ҳамзамон вакилони палатаи поёнии Парлумон «Созишнома дар бораи махсусгардонии бисёрҷонибаи байнидавлатии истеҳсол ва таҳвили тухмии навъҳо ва дурагаҳои зироатҳои кишоварзӣ, кӯчату ниҳолҳои меваю буттамева ва ток»-ро ба тасвиб хоҳанд расонд.