Ҷаласаи дуюми Шӯро оид ба бехатарии маҳсулоти хўрокворӣ

 
Душанбе, 25.12.2014. (АМИТ «Ховар»).- 24 декабри соли 2014 дар ҳузури муовини Сарвазири Ҷумҳурии Тоҷикистон Азим Иброҳим ҷаласаи дуюми Шўрои ҳамоҳангсозӣ оид ба бехатарии маҳсулоти хўрокворӣ баргузор гардид. 
Мақсади асосии ҷаласа- ин таъмин намудани бехатарии маҳсулоти хўрокворӣ дар ҳудуди кишвар аз тариқи ҷоннок кардани фаъолияти сохторҳои хизматрасон дар бозори бехатарии маҳсулоти хўрокворӣ, аз нигоҳи ҳимояи манфиатҳои миллӣ комил гардонидани меъёрҳои ҳуқуқии қонунҳои амалкунанда, таҳия намудани зерқонунҳои соҳавӣ ва мутобиқ намудани онҳо ба талаботи байналмилалӣ (Созмони Умумиҷаҳонии Савдо), дар ҳамбастагӣ бо сохторҳои дахлдор таҳия намудани меъёрҳои техникии ивазкунандаи стандартҳои амалкунанда мебошад.
Вобаста ба ин таъкид шуд, ки зерқонунҳои таҳияшаванда ҳудуд ва вазифаҳои сохторҳои хизматрасонро дар бозори таъмини бехатарии маҳсулоти хўрокворӣ муайян сохта, ҳимояи манфиатҳои молистеҳсолкунандагону воридкунандагони маҳсулоти хўроквориро бояд таъмин намоянд. 

Аъзои Шўрои мазкур вобаста аз самти фаъолият гурӯҳбандӣ шудаанд, ки чор самти муҳим-масъалаҳои вобаста ба ҷалби сармоягузорӣ, иқтисодӣ, соҳибкорон ва истеъмолкунандагон, масъалаҳои байторӣ, фитосанитарӣ ва карантини растанӣ, масъалаҳои санитарӣ-эпидемиологӣ,  масъалаҳои ғизою хўрокворӣ ва мутобиқат ба ҳуҷҷатҳои меъёриву техникии ҲМТ (техрегламент, стандарт, шартҳои техникӣ ва ғ.)- ро фаро мегиранд. 

 Дар ҳамин ҷаласа нақшаи чорабиниҳои фаъолияти гурӯҳҳои мазкур барои соли 2015 тасдиқ шуд.