Вазъи будубоши шаҳрвандони хориҷӣ дар Ванҷ

Душанбе, 19.12.2014 (АМИТ «Ховар», Лайло Тоирӣ).-Дар  ҳудуди ноҳияи Ванҷ 30 нафар шаҳрванди Ҷумҳурии Мардумии Чин дар сохтмони кӯпруки мавзеи Сурхсангови деҳаи Ваҳдати ҷамоати деҳоти Водхуд дар асоси созишнома кор мекунад.
Аз ҷониби кормандони бахши Хадамоти муҳоҷират дар ноҳияи Ванҷ бо мақсади назорати будубоши шаҳрвандони хориҷӣ дар қаламрави ноҳия, пайваста санҷишҳо гузаронида мешаванд.
Ба иттилои Хадамоти муҳоҷирати Вазорати меҳнат, муҳоҷират ва шуғли аҳолии ҷумҳурӣ зимни гузаронидани санҷишҳо маълум гардид, ки ҳуҷҷатҳои шаҳрвандони чинӣ, аз қабили раводид, рухсатнома ва иҷозати корӣ, инчунин бақайдгирии онҳо сари вақт анҷом дода шудааст.
Ҳамчунин дар давоми моҳи декабри соли равон ҳуҷҷатҳои 7 нафар шаҳрванди Ҷумҳурии Молдова мавриди санҷиш қарор дода шуда, маълум гардид, ки барои гирифтани иҷозати корӣ ҳуҷҷатҳояшонро ба шуъбаи Хадамоти муҳоҷират дар ВМКБ пешниҳод кардаанд.
Кормандони бахши Хадамоти муҳоҷират дар ноҳияи Ванҷ минбаъд низ чунин тадбирҳоро ҷиҳати танзими раванди муҳоҷирати меҳнатии шаҳрвандони хориҷӣ дар қаламрави ин ноҳия меандешанд.