Паём- ифодагари самтҳои асосии сиёсати дохилӣ ва хориҷӣ

Душанбе, 09.02.2015. (АМИТ «Ховар», Мавҷуда Анварӣ).- Бо мақсади тарғиби ҳадафҳои стратегии давлату Ҳукумати кишвар, ки аз Паёми Президенти Ҷумҳурии Тоҷикистон ба Маҷлиси Олӣ бармеояд, аз ҳисоби зиёиён ва ҷомеаи меҳнатии шаҳри Хуҷанд гурӯҳи тарғиботӣ ташкил шудааст, ки бо сокинони маркази вилоят силсилаи мулоқотҳои судмандро анҷом медиҳад. 
Ҳафтаи сипаригардида гурӯҳ дар кумитаи маҳаллаҳо ва корхонаю муассисаҳои шаҳри Хуҷанд дар мавзӯи «Паёми Президенти Ҷумҳурии Тоҷикистон — ифодагари самтҳои асосии сиёсати дохилӣ ва хориҷии Ҷумҳурии Тоҷикистон» суҳбатҳо доир намуда, корҳои тарғиботии худро идома дод. 
Самтҳои асосии сиёсати дохилӣ ва хориҷии кишвар, аз қабили таъмини рушди устувори иқтисодиву иҷтимоии мамлакат дар соҳаҳо,   самти пешгирии амалҳои террористию ифротгароӣ, нашъамандӣ ва гардиши ғайриқонунии маводи мухаддир, баланд бардоштани ахлоқ ва саводи ҷавонон, нақши волидайн дар тарбияи фарзанд, таҷдиди фаъолияти муассисаҳои томактабӣ ва ташкили шаклҳои нави кӯдакистонҳо оид ба ҷомеаи солим, оилаи солим, насли солим ва дар маҷмӯъ эълон гардидани «Соли 2015-соли  оила» мавриди муколамаи иштирокдорон қарор гирифт.
Дар вохӯриҳо масъалаҳои бо ҷойҳои нави корӣ таъмин намудани ҷавонон, муҳоҷирати меҳнатӣ, дастгирии ихтироъкорон ва навоварони ҷавон, соҳибкорон, маблағгузорӣ ба корҳои илмӣ-тадқиқотӣ ва дигар масъалаҳо мавриди баррасӣ қарор гирифтанд.
Силсилаи мулоқоти зиёиён бо сокинони шаҳри Хуҷанд идома дорад.