Фазои солими интихоботӣ дар Бадахшон

Душанбе, 1.03.2015. (АМИТ «Ховар», Мавҷуда Анварӣ).-Дар 271 участкаи интихоботии Вилояти мухтори кӯҳистони Бадахшон мардум субҳи барвақт бо рӯҳияи баланди ватандӯстона ва ҳамдилӣ ба участкаҳои интихоботӣ ҳозир шуда, ба хотири фардои ҷомеа ва пешрафту шукуфоии мамлакат мавқеи худро муайян намуданд. 
Ширкати фаъоли мардум дар интихоботи вакилон ба Маҷлиси намояндагони Маҷлиси Олии ҶТ, маҷлисҳои маҳаллии вакилони халқ нишонаи рушди ҷомеаи демократӣ ва ҳуқуқбунёд дониста мешавад. 
Раъйдиҳандагон мегӯянд, ки овози онҳо дар ин маъракаи муҳими сиёсӣ ҳалкунанда аст, зеро таъмини зиндагии шоиста ба амалӣ кардани тарҳҳои муҳим, аз ҷумла дар бахшҳои қонунгузории кишвар ва рушди соҳаҳои иқтисоду маориф,  фарҳанг, кишоварзӣ, энергетика ва дигар самтҳои муҳими хоҷагии халқ аз талошу кӯшишҳои вакилони мардумӣ вобаста аст. Барои дар сатҳи баланд баргузор намудани интихоботи вакилони Маҷлиси намояндагони Маҷлиси Олии ҶТ, маҷлисҳои маҳаллии вакилони халқ дар тамоми ҳавза ва участкаҳои интихоботӣ шароит фароҳам оварда шудааст. 
Дар маркази Вилояти мухтори кӯҳистони Бадахшон шаҳри Хоруғ 13 участкаи интихоботӣ фаъолият дорад, ки теъдоди раъйдиҳандагони он 17 ҳазору 50 нафарро ташкил медиҳад. Аз ин теъдод 56 нафар дар ин маъракаи муҳими сиёсӣ бори аввал ширкат мекунанд.