Машғулиятҳои таълимии ҳарбӣ дар гарнизонҳои ҷумҳурӣ

Душанбе, 15.04.2015. (АМИТ  «Ховар», Лайло Тоирӣ).- Дар  гарнизонҳои ҷумҳурӣ маҷмӯи машқҳои низомӣ, ҷамъомадҳои саҳроӣ ва дигар машғулиятҳои таълимии ҳарбӣ ҷараён доранд. Ҳафтаи сипаригардида дар машқгоҳҳои ҳарбии гарнизони Душанбе машғулиятҳои омодагии сафарбарӣ, ба таври амалӣ ва бо тирпаронии ҷангӣ аз навъҳои мухталифи техникаҳои зиреҳпӯши ҳарбӣ ва яроқу аслиҳаи сабуки ҷангӣ доир шуданд.
Ба он шаҳрвандони дар эҳтиёт қарор доштаи ноҳияҳои Исмоили Сомонӣ, Сино, Шоҳмансур, Фирдавсии пойтахт, ноҳияи Варзоб ва шаҳрҳои Турсунзодаву Ваҳдат ҷалб гардиданд. Бино ба иттилои хадамоти матбуоти Вазорати мудофиаи ҷумҳурӣ, барои дар сатҳи зарурӣ гузаронидани машғулиятҳо нуқтаҳои таълимии муҷаҳҳаз бо шароити техникӣ ва дигар лавозимоти ҳарбӣ ташкил шуда, бо мақсади риояи дақиқи бехатарӣ зимни машғулиятҳо роҳбарии машқҳои тирпарронӣ ва назорат аз болои ҳайати шахсиро шахсони масъули комиссариатҳои ҳарбӣ бар уҳда доштанд.
Чунин машғулиятҳои амалии саҳроӣ оид ба омӯзиш ва истифодаи қувваву воситаҳои муосири техникаву аслиҳаи ҳарбӣ ва бо мақсади сайқал додани маҳорати ҷангӣ дар ҳудуди вилояти Суғд низ бо ҷалби қувваҳои эҳтиётӣ ё худ шаҳрвандони дар қайди комиссариатҳои ҳарбӣ будаи ин гарнизон ба роҳ монда шуд.
Афсарони масъуле, ки машғулиятҳои таълимиро дар ҳудуди ин минтақа роҳбарӣ менамуданд, барои дар амал татбиқ намудани барномаҳои омӯзишӣ мавзӯъҳои сафарбариро дар ҳузури ҷамъомадагон баррасӣ карданд.