Идомаи бозтоби Конфронси оби Душанбе дар расонаҳои мисрӣ

Душанбе, 06.05.2015. (АМИТ «Ховар»). — 5 майи соли 2015 рӯзномаи “ал-Ҷумҳурия” (рӯзномаи мазкурро роҳбари собиқи Миср Ҷамол Абдунносир соли 1953 таъсис додааст) хабареро дар бораи Конфронси байналмилалии сатҳи баланд роҷеъ ба татбтиқи Даҳсолаи байналмилалии амал “Об барои ҳаёт”, 2005-2015, ки дар Душанбе 9-11 июни соли 2015 баргузор мегардад, ба шарҳи зер чоп кардааст:
“Даъвати Маҳлаб барои ҳузур дар Конфронси байналмилалии об дар Тоҷикистон
Навиштаи ас-Сайид Ҳонӣ. Иброҳим Маҳлаб, Нахуствазир аз Сарвазири Тоҷикистон барои иштирок дар Конфронси байналмилалии сатҳи баланд роҷеъ ба татбиқи Даҳсолаи байналмилалии амал “Об барои ҳаёт”, 2005-2015, ки 9-11 июни соли ҷорӣ дар пойтахти кишвар — Душанбе баргузор гардида, онро Президент Эмомалӣ Раҳмон хоҳад кушод, даъватнома гирифт.
Сафири Тоҷикистон дар Қоҳира Хусрав Нозирӣ ба “ал-Ҷумҳурия” таъкид намуд, ки кишвараш таваққуъ дорад, ки Миср ба сифати кишвари меҳварӣ дар минтақаи Ховари Миёна ва Африка, ки ҳар ду бо камбуди об рӯбарӯ мебошанд, дар ин конфронс ба гунаи фаъол ширкат хоҳад намуд.”