ММТ: Довталабон ҳуқуқи додани аризаи апеллятсиониро доранд

Душанбе, 24.07.2015. (АМИТ «Ховар», Ситораи Боймурод).-Маркази миллии тестии назди Президенти Ҷумҳурии Тоҷикистон иттилоъ медиҳад, ки бо мақсади таъмин ва риояи ҳуқуқ ба арзёбии воқеии донишу маҳорати довталаб ба ӯ ҳуқуқи додани аризаи апеллятсионӣ дар бораи норозӣ будан аз натиҷаи имтиҳонҳо дода шудааст. 
Бино ба иттилои ММТ, қабули аризаҳои апеллятсионӣ дар давоми 3 рӯз пас аз эълони натиҷаҳо, яъне рӯзҳои 25‑ум  27‑уми июли соли равон дар дафтари асосии Маркази миллии тестии назди Президенти Ҷумҳурии Тоҷикистон, бахшҳои минтақавии он дар шаҳрҳои Хуҷанд, Қӯрғонтеппа ва Хоруғ ва муассисаҳои таълимии шаҳру ноҳияҳои Истаравшан, Кӯлоб, Данғара ва Рашт ба роҳ монда мешавад.
Хотиррасон менамоем, ки баррасии аризаи апеллятсионӣ маънои аз нав имтиҳон супоридан ё имконияти бо ин ё он роҳ ба даст овардани холи намерасидаро надошта, балки дар ҷараёни он танҳо дурустии натиҷаҳои имтиҳонсупории довталабе, ки аризаи апеллятсионӣ додааст, санҷида мешавад.
Агар натиҷаи имтиҳонҳои довталаб дурусту ҳақиқӣ бошад, комиссияи апеллятсионӣ ҳуқуқи ба довталаби аз ин ё он субтест(фан) холи гузаришро соҳибнашуда додани холро надорад.
Комиссияи апеллятсионӣ тибқи тартиб дар дафтари асосии Маркази миллии тестии назди Президенти Ҷумҳурии Тоҷикистон  фаъолият мекунад ва аризаҳои пешниҳоднамудаи довталабонро дар давоми то 7 рӯз баррасӣ намуда, довталабони аризадодаро аз натиҷаҳои баррасӣ огоҳ менамояд. 
Аз рӯйи натиҷаи баррасии аризаи апеллятсионӣ дар бораи норозӣ будан аз натиҷаҳои имтиҳон комиссияи  апеллятсионӣ метавонад, ки яке аз қарорҳои зеринро мувофиқан қабул намояд.
Аризаҳои апеллятсионии танҳо барои шинос шудан бо варақаи ҷавобҳои пуркардаи довталаб пешниҳодшуда баррасӣ карда намешаванд, зеро нусхаи варақаҳои ҷавобҳои пуркардаи ҳар довталаб дар кабинети инфиродиаш гузошта шудааст.
Ёдовар мешавем, ки натиҷаҳои дар имтиҳонҳо аз субтестҳо (фанҳо) бадастовардаи ҳар довталаб бо нишон додани хол, бал ва маълумот дар бораи соҳиб шудан ё нашудани довталаб ба холҳои гузариш ва роҳ ёфтан ё наёфтани ӯ ба озмуни тақсимот 25‑уми июл эълон карда мешаванд.