Ғалабаи “Равшан”- у “Барқи тоҷик” бар КМВА “Помир”-у “Вахш”

Душанбе, 17.08.2015 (АМИТ  «Ховар»,  Меҳрони   Қурбон)-Шоми 15 август, бозиҳои даври дувоздаҳуми чемпионати Тоҷикистон байни дастаҳои лигаи олӣ баргузор  шуданд. Дар ин давр  чемпиони  амалкунандаи  кишвар дастаи “Истиқлол”-и Душанбе аввалин имтиёзҳои худро дар мавсими имсолаи футбол аз даст дод. Бояд  зикр кард, ки  дастаи “Истиқлол” бозиро дар меҳмонӣ бо  “Регар-ТадАЗ”-и  Турсунзода мусовӣ ва бидуни гол анҷом дод. Дар мавсими имсолаи футбол ин нахустин бозиест, ки футболбозони дастаи пойтахт ба  фатҳи  дарвозаи  ҳариф  муваффақ  намешаванд. Вохӯрӣ байни дастаҳои “Хайр” ва “Хуҷанд” низ мусовӣ 1 бар 1 анҷом ёфт. Дар  бози дигар дастаи “Равшан”-и  Кӯлоб  дар майдони худ бо ҳисоби  минималии  1 бар 0 бар КМВА “Помир” пирӯз  шуд. Баъди ин ғалаба дастаи “Равшан” ба зинаи сеюми ҷадвали чемпионат баромад. Ёдовар мешавем, ки дастаи  “Парвоз”-и ноҳияи Бобоҷон Ғафуров  имтиёзи нахустинро соҳиб шуд. Дастаи “Парвоз” дар Истаравшан бозиро бо “Далерон-Уротеппа” мусовӣ 1 бар 1 анҷом дод.  Дастаи  “Барқи тоҷик”  дар  майдони худ  “Вахш”-и  Қӯрғонтеппаро бо ҳисоби  2 бар 0  мағлуб  кард.