Тасмими Олмон дар бораи ба Афғонистон ворид намудани қӯшунҳои иловагӣ

Душанбе, 19.11.15. (АМИТ «Ховар»). — Ҳукумати Ҷумҳурии  Федеративии  Олмон тасмим  гирифт, ки ҷузъу  томҳои ҳарбии  худро  дар  Афғонистон  баробари 130  нафар зиёд  намояд. Изҳороти  дахлдор  аз  рӯи  натиҷаи  ҷаласаи  девони  вазирон  дарҷ  гардид. 
Қарори  мазкур  аз  рӯи  натиҷаи  арзёбии  вазъи  амнияти  Ҷумҳурии  Исломии  Афғонистон, ки  бинобар  аз кишвар  хориҷ  намудани қисми  асосии  ҷузъу  томҳои   қӯшунҳои  хориҷӣ  соли  ҷорӣ  хеле  бад  гардидааст,  қабул  шуд. 
Баъди  дар  охири  моҳи  сентябр   шаҳри  Қундузи  Афғонистонро  ишғол  намудани силоҳбадастони  «Толибон»  вазири  мудофиаи  Олмон Урсула фон дер Ляйен изҳор  дошт, ки  масъалаи  ихроҷи  қӯшунҳо  мавқуф  гузошта мешавад. Баъдтар ҳукуматҳои  ИМА ва  Британияи  Кабир дар  бораи  тамдиди  муддати ҳузури  низомиён  дар Ҷумҳурии  Исломии   Афғонистон  қарор  қабул  карданд.
Алҳол  дар  Афғонистон  қариб  850  нафар  низомиёни  Олмон   дар  қисми  шимолии  кишвар   хидмат  мекунанд. Назар  ба  хабари  Агентии  иттилоотии Reuters,  шумораи  низомиёни  Олмон дар  ин  ҷо бояд  ба  980  нафар расонида шавад.