6 корманди нуқтаи мубодилаи асъор боздошт шуд

Душанбе, 1.12.2015 (АМИТ «Ховар»).-Дар даҳаи сеюми моҳи ноябри соли ҷорӣ вазъи бозори нақдии хариду фурӯши доллари ИМА боз ҳам ноустувор гашта, суръати тағйирёбии қурби нақдӣ нисбат ба моҳҳои гузашта ба маротиб зиёд гашт.
Таҳлили бозор нишон медиҳад, ки кормандони алоҳидаи нуқтаҳои мубодилаи асъор аз чунин вазъ сӯйистифода бурда, бо ҳар гуна роҳу восита қурби фурӯши доллари ИМА-ро беасос ва худсарона баланд мекарданд. Барои пешгирӣ намудани ин ҳолатҳо кормандони Бонки миллии Тоҷикистон дар якҷоягӣ бо мақомоти прокуратура дар ҳайати гурӯҳҳои фаврии муштарак 27 ноябри соли ҷорӣ 6  корманди нуқтаҳои мубодилаи асъори ташкилоти амонатии қарзии хурди «Васлат», «Азизи молия”, “Вориси замон” ва ҶСК “Тоҷиксодиротбонк”-ро дар шаҳри Душанбе муайян ва боздошт карданд.
Маълум гашт, ки онҳо маблағҳои ҳангуфти пули миллӣ ва асъори хориҷиеро, ки аз маблағҳои зерҳисобашон чандин маротиба  зиёданд, дар хазина нигоҳ дошта, ба хариду фурӯши ғайрирасмии асъор машғул будаанд.
Маҳз  чунин беинсофӣ ва бемасъулиятии ба ҳамин монанди кормандони нуқтаҳои мубодилаи асъор Бонки миллии Тоҷикистонро водор кард, ки барои барҳам додани нуқтаҳои мазкур қарор қабул намояд.