Ошкор ва пешгирии воридоти маводи пиротехникӣ

     Душанбе, 14.12.2015. (АМИТ «Ховар»).- Кормандони Раёсати минтақавии гумрукӣ дар вилояти Суғд пеши роҳи воридот ва паҳн гардидани маводи пиротехникиро  пешгирӣ намуданд. 
    Дар натиҷаи гузаронидани як  амалиёт  дар роҳи мошингарди Конибодом-Хуҷанд воситаи нақлиёти тамғаи «Опел- Зафира» таҳти идораи шаҳрванд Зафар Мансуров, истиқоматкунандаи шаҳри Хуҷанд  барои муоинаи гумрукӣ боздошта шуд. Зимни  гузаронидани муоинаи гумрукӣ аз дохили бордони воситаи нақлиёти мазкур  аз дохили  48 қуттии  калони картонӣ бо навиштаҷоти «Трения», «Чёрная смерт», ва «Цай ванн лэй»  ба миқдори умумии  23  ҳазору 944 дона маводи тарфгарӣ дарёфт  шуд.          
   Ин миқдор маводи тарфгарӣ ба шаҳрванд Икромбек Усмонов, истиқоматкунандаи шаҳри Хуҷанд тааллуқ дошта, ӯ ин миқдор маводро аз як  шаҳрванди Ҷумҳурии Қирғизистон дар  ҳудуди деҳаи Аркаи Ҷумҳурии Қирғизистон ба ҷои қарзаш гирифта, мехост ба шаҳри Хуҷанд бурда фурӯшад. 
     Мутобиқи ташхиси лабораторӣ маводи пиротехникии аз шаҳрванди  номбурда   гирифташуда  аз моддаҳои таркандаи хатарнок  сохта шуда,  барои ҳаёт ва саломатии инсон хеле  хатарнок  ва зараровар мебошанд. Аз рӯи ҳолати мазкур нисбат ба шаҳрванд Икромбек Усмонов парвандаи ҷиноятӣ бо моддаи 199 эзоҳ-1 қисми 2-и КҶ Ҷумҳурии Тоҷикистон оғоз  шуда, аз рӯи тобеияти тафтишотӣ ба Прокуратураи вилояти Суғд фиристонида шуд. 
         Дар ин бора ба АМИТ «Ховар» аз Хадамоти гумруки назди Ҳукумати Ҷумҳурии Тоҷикистон хабар доданд,