Таҳлилу баррасии таҷрибаи Владимир Ежуров бо мураббиёни тоҷик

Душанбе, 7.12.2015 (АМИТ «Ховар»).-Шогирди футболи тоҷик Владимир Ежуров, ки солҳои тӯлонӣ дар сохтори бошгоҳи футболи «Рубин»-и Қазон фаъолият кардаст, таҷрибаи худро бо мураббиёни бошгоҳҳо ва тимҳои мунтахаби футболи Тоҷикистон таҳлилу баррасӣ мекунад.
Имрӯз, 5 декабр, дар маҷлисгоҳи Федератсияи футболи Тоҷикистон семинари серӯзаи мураббиёни бошгоҳҳо ва дастаҳои мунтахаби футболи Тоҷикистон оғоз шуд. Семинарро тарбиятдидаи футболи тоҷик, ки дар гузаштаи наздик вазифаи сармураббии бошгоҳи футболи «Енисей»-и кишвари Красноярскро ба уҳда дошт — Владимир Ежуров роҳбарӣ мекунад.
Владимир Ежуров фаъолияти мураббигариро аз бошгоҳи футболи «Пахтакор»-и ноҳияи Ҷаббор Расулов оғоз кардааст. Мавсуф дар дастаи «Пахтакор» дар давоми шаш сол фаъолият карда, солҳои 1993 ва 1994 барандаи медалҳои нуқраи чемпионати Тоҷикистон шуда аст.
Владимир Ежуров дар бошгоҳҳои футболи «Металлург» (Бекобод), «Симурғ» (Ангрен) ва инчунин «Хуҷанд»-и Хуҷанди Тоҷикистон низ фаъолият дошт. Дар давоми фаъолияти мураббии худ дар Тоҷикистон Владимир Ежуров аъзои ситоди мураббиёни тимҳои мунтахаби ҷавонон ва тими миллии Тоҷикистон низ буд.
Сар аз соли 2003 Владимир Раимович ба сохтори бошгоҳи футболи «Рубин»-и Қазон гузашт. Дар бошгоҳ ӯ ба ҳайси мураббӣ-селексионер, ҳамчунин мураббии ҳайати ҷавонони «Рубин» фаъолият кардааст. Владимир Ежуров муддати кӯтоҳ дар бошгоҳҳои футболи «Балтика»-и Калининград ва «Нефтихимик»-и Нижнекамск низ ба ҳайси мураббӣ кор кардааст.
Соли гузашта Владимир Ежуров мавсими омодагиро сипарӣ намуда, имтиҳонҳои Академияи маҳорати мураббии Иттиҳоди футболи Русияро бомуваффақият супурд ва соҳиби муҷаввизи мураббии  PRO шуд.