Барои риоя накардани қоидаҳои бехатарӣ масъулин ба ҷавобгарии маъмурӣ кашида шуданд
![](https://khovar.tj/wp-content/uploads/2016/01/DSC_5121.jpg)
Душанбе, 15.01.2016. (АМИТ «Ховар»). — Аз ҷониби кормандони Хадамоти назорати давлатии бехатарии корҳо дар саноат ва соҳаи кӯҳкории назди Ҳукумати ҶТ, шахсони масъули корхонаҳо барои риоя накардани қоидаҳои бехатарии саноатӣ ба ҷавобгарии маъмурӣ кашида шуда, ба маблағи 332 ҳазору 470 сомонӣ ҷаримабандӣ шудаанд, ки нисбат ба марҳилаи ҳисоботии соли гузашта 3 маротиба зиёд мебошад. Ин нукта имрӯз зимни нишасти матбуотии Хадамоти назорати давлатии бехатарии корҳо дар саноат ва соҳаи кӯҳкории назди Ҳукумати ҶТ таъкид шуд.
Дар давраи ҳисоботӣ шумораи корхонаҳои бақайдгирифташуда 227 ва иншоот 802 ададро ташкил дод. Дар натиҷаи муоинаи 324 иншоот ба роҳбарони корхонаву ташкилот барои бартараф намудани камбудиҳо ва қонунвайронкуниҳо беш аз 1 ҳазору 314 нишондод пешниҳод гардидааст.
«Соли 2015 аз тарафи кормандони хадамот дар корхонаҳои зериназоратӣ нозироти марказӣ — 225 ва нозироти маҷмӯӣ — 205 ҷаласа оид ба талаботи бехатарии саноатӣ, ҳифзи меҳнат ва фаҳмонидани моҳияти Қонуни Ҷумҳурии Тоҷикистон «Дар бораи бехатарии саноатии иншооти истеҳсолии хатарнок» гузаронида шуд»,-илова намуд сардори хадамот Раҳим Санъат Асо.