Футзали Осиё дар Тошканд

Душанбе, 11.02.2016 (АМИТ «Ховар»).- Дар шаҳри Тошканд бозиҳои ниҳоии Ҷоми Осиё аз футзал оғоз ёфтанд. Дар гурӯҳи “А” соҳибони майдон- дастаи мунтахаби Ӯзбекистон бар меҳмони худ-дастаи мунтахаби Арабистони Саудӣ бо натиҷаи 5 бар 2 пирӯз гардиданд. Дар ин гурӯҳ футзалистони Қирғизистон бо тими мунтахаби Лубнон вохӯриашонро бо ҳисоби 4 бар 4 ҷамъбаст карданд.
Дар гурӯҳи “Б” тими мунтахаби Эрон дастаи мунтахаби Урдунро бо ҳисоби 6 бар 1 шикаст дод ва дар ҳамин гурӯҳ футзалистони ироқӣ дар муқобили мунтахаби Чин бо бартарии 6 бар 0 ба пирӯзӣ расиданд.
Имрӯз дар гурӯҳи “С” тими мунтахаби Тоҷикистон дар соати 16:30 дақиқа бо дастаи мунтахаби Таиланд вориди майдон мешавад. Таиланд яке аз дастаҳои муддаии унвони қаҳрамонии футболи Осиё дар соли равон номбар мешавад. Таиландиҳо дар гузашта дар ҳама бозиҳои ниҳоӣ ширкат карда, солҳои 2008 ва 2012 соҳиби медалҳои нуқра ва солҳои 2000, 2002, 2003 ва 2004-ум барандаи медалҳои биринҷии Чемпионати Осиё шудаанд.
Дастаи мунтахаби Тоҷикистон дар ҳашт бозии ниҳоии Чемпионати Осиё иштирок карда, соли 2007-ум то марҳалаи ¼ ниҳоӣ баромадааст.