“Хуҷанд” дар бозии аввалини Ҷоми КФО

Душанбе, 9.02.2016 (АМИТ «Ховар»). Имрӯз клуби футболи «Хуҷанд” дар бозии плей-офф, барои Ҷоми Конфедератсияи футболи Осиё дар шаҳри Хеврони Фаластин бо тими “Аҳли Алхалилӣ”-и ин кишвар дар соати 19 ба вақти Душанбе вориди сабқат мешавад. Тавре ки сармураббии даста Нӯъмон Юсупов дар нишасти матбуотӣ арз кард, “ Хуҷанд” танҳо барои ғолиб омадан дар ин бозӣ ба Фаластин омадааст ва даста ният дорад ба бозиҳои гурӯҳӣ роҳ ёфта, шарафи Тоҷикистонро ҳимоя кунад”. То кадом андоза сармураббӣ ба ин гуфтаҳояш мӯътақид аст, ҳунарнамоии футболбозон дар майдони футбол ба он ҷавоб хоҳад гуфт. “Хуҷанд” ба ҳайаташ 8 бозингари нав шомил кардааст, ки ҳама аз Тоҷикистонанд. Дар ҷараёни сафар ба футболбозони мо зарур омад, ки дар сарҳади Исроил ва Фаластин беш аз 5 соат интизорӣ кашанд.
Ёдрас мешавем, ки дар сурати ғалаба дар ин вохӯрӣ, ғолиб ба гурӯҳи “Д” шомил шуда, бо дастаҳои “Алмуҳаррак”-и Баҳрайн, “Фанҷа”-и Уммон ва “Алҷайш”-Сурия муборизаро барои Ҷоми КФО идома медиҳад.