Ҳамоиши илмӣ ба ифтихори Пешвои миллат

Душанбе, 10.03.2016.(АМИТ Ховар).-«Имрӯз мардуми Тоҷикистон Эмомалӣ Раҳмонро на танҳо ҳамчун Сарвари хеш, балки наҷотбахши давлат, сарҷамъкунандаи миллат, кафили сулҳу ваҳдат, бунёдгузори иқтисоди кишвар, эҳёгари фарҳанги миллӣ, асосгузори мактаби давлатдории муосири миллӣ мешиносанд ва қадрдонӣ мекунанд»,- зикр шуд зимни баргузории ҳамоиши илмии «Менеҷери муосир»-и кафедраи идоракунии захираҳои инсонии Донишкадаи идоракунии давлатии назди Президенти Ҷумҳурии Тоҷикистон.
Дар ҳамоиш роҳбарони воҳидҳои сохтории донишкада, омӯзгорон ва донишҷӯён ширкат намуда, дар мавзӯъҳои «Ҷавонон — пайрави Пешвои миллат ва муҳофизи дастовардҳои истиқлолият», «Пешвои хирадманд ва раҳнамои ояндабин», «Нақши Пешвои миллат Эмомалӣ Раҳмон дар таъмини сулҳу ваҳдати миллӣ дар Тоҷикистон» сухан карданд. Инчунин донишҷӯён зимни ироаи маърӯзаҳои илмӣ доир ба саҳми Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон Эмомалӣ Раҳмон дар таҳкими истиқлолияти миллӣ, сулҳу ваҳдат, муаррифии Тоҷикистон дар арсаи байналмилалӣ, рушди соҳаҳои иқтисодию иҷтимоӣ маълумоти муфассал доданд.
Дар фарҷоми ҳамоиш мудири кафедраи идоракунии захираҳои инсонии Донишкадаи идоракунии давлатии назди Президенти кишвар Шосаидзода Сафар Ҳасан зикр намуд, ки баргузории чунин ҳамоишҳои илмӣ ба таҳкими худшиносӣ, ватандӯстӣ, ифтихори миллӣ, баланд гардидани савияи дониш ва рушди зеҳнии донишҷӯён мусоидат менамояд.