Артиши Нигерия беш аз 60 нафарро аз асорати гурӯҳи ифротии «Боко ҳарам» озод кард

Душанбе, 04.03.2016. (АМИТ «Ховар»). «Артиши ҳукумати Нигерия зимни як амалиёт дар қисмати шимолу шарқи ин кишвар 63 нафарро аз асорати гурӯҳи ифротии «Боко ҳарам» озод кард. Дар ин бора намояндаи расмии қувваҳои мусаллаҳи Нигерия Санӣ Усмон хабар дод.
Бино ба гуфтаи ӯ, амалиёт дар маҳалҳои аҳолинишини Лавин Мелерӣ, Матирӣ Булака ва Алҷерӣ гузаронида шуд. Зимни амалиёт 5 ҷангии гурӯҳи ифротии «Боко ҳарам» маҳв гардида, миқдори зиёди аслиҳаи онҳо мусодира шудааст. Илова бар ин, ба неруҳо муяссар гардидааст, ки бошгоҳи ин гурӯҳи ифротиро дар ҷангалзори Алагарнои иёлати Борно муайян ва хароб созанд.