“Хуҷанд” аз КМВА “Помир” беҳтар буд

Душанбе, 3.03.2016 (АМИТ «Ховар»).-Дар варзишгоҳи марказии пойтахт мусобиқаи футболбозон барои Ҷоми ФФТ идома дорад. Дирӯз дар бозии дуввуми гурӯҳи “Б” тими “Хуҷанд”-и Хуҷанд ҳарифи худ КМВА “Помир”-ро бо натиҷаи 3 бар 1 мағлуб карда, ба садри гурӯҳ роҳ ёфт. Ба узви дастаи мунтахаби Тоҷикистон Фарҳод Тоҳиров муяссар шуд, ки бо ду голи задааш ба мақоми аввали нишонзанҳои беҳтарини мусобиқа шомил шавад. Голи дигари ғолибонро Дилшод Бозоров ба самар расонид. Даврон Тӯхтасунов аз КМВА “Помир” тавонист ягона голи тасаллияти сарбозонро ба ҳадаф расонад.
Дар гурӯҳи “Б” “Истиқлол” як рӯз пештар бар “Саройкамар” бо натиҷаи 2 бар 0 пирӯз шуда буд.
Имрӯз соати 10 дастаҳои “Хайр” бо “Помир” ва дар соати 16 “Регар ТадАЗ” бо “Вахш” вориди майдон мешаванд.
Аз сабаби он, ки дастаи “Қайроққум” аз ҳаққи иштирок дар бозиҳои ниҳоӣ даст кашид ва ба мусобиқа ҳозир нашуд, ФФТ ба ҷои он дастаи мунтахаби наврасони то 16-солаи кишварро, ки бо номи “Помир” ҳунарнамоӣ дорад, ба гурӯҳи “А” шомил кард.