«Корвони саломатӣ» дар Кӯлоб

Душанбе, 10.03.2016 (АМИТ «Ховар»).- «Корвони саломатӣ»-и Вазорати тандурустӣ ва ҳифзи иҷтимоии аҳолии Тоҷикистон дар ҳайати 112 нафар, бо шумули роҳбарони муассисаҳои ҷумҳуриявӣ, устодони баландпояи муассисаҳои олии таълимии тиббии ҷумҳуриявӣ, мутахассисони соҳибтаҷрибаи соҳаи тиб ба шаҳри Кӯлоб сафар намуд.
Нусратулло Салимзода, вазири тандурустӣ ва ҳифзи иҷтимоии аҳолии кишвар дар чорабиниҳои марказонидашуда дар шаҳри Кӯлоб оид ба гузаронидани ин чорабинии тиббию машваратӣ, ки мақсади он пешгирии беморшавии аҳолӣ ва боло бурдани фарҳанги тиббии ҷомеа дар доираи татбиқи ҳадафҳои бунёдии «Дурнамои пешгирӣ ва назорати бемориҳои ғайрисироятӣ ва осеббардорӣ дар Ҷумҳурии Тоҷикистон барои солҳои 2013-2023», ҳамчунин ташаккули тарзи ҳаёти солим ва ба мардум наздик намудани хизматрасонии тиббӣ мебошад, суҳбат орост.
Ҳамчунин дар доираи чорабинӣ табибони маҳаллӣ имконият пайдо намуданд, ки дар ҷараёни кор роҳҳои нави ташхису табобат ва ҷарроҳии муосирро аз устодон, мутахассисони баландпояи тиб омӯзанд.
Барои аҳолии шаҳр ин як кумакест, ки онҳо аз маҳалли худ берун нарафта, ташхису машварат мегиранд.