Муаррифии номзадҳо дар ДМИТ

Душанбе, 18.03.2016. (АМИТ «Ховар»).- Бо сабаби бозхонд шудани вакили мардумии ҳавзаи интихоботии №1 Фирдавсӣ 10 апрели соли равон дар ин ҳавзаи интихоботӣ интихоботи миёнадаврӣ гузаронида мешавад. Бинобар ин 16 марти соли равон дар Донишкадаи молия ва иқтисоди Тоҷикистон вохӯрии номзадҳо ба вакилии Маҷлиси намояндагони Маҷлиси Олии ҶТ аз ҳавзаи интихоботии №1 Фирдавсӣ бо интихобкунандагон доир гардид.
Тавре ки аз донишкада хабар доданд, дар вохӯрӣ чор номзад аз ҳизбҳои сиёсии мамлакат — Насриддинзода Эмомалӣ Сайфиддин аз Ҳизби халқии демократии Тоҷикистон, Мавлуда Раҷабова аз Ҳизби сотсиалистии Тоҷикистон, Сарвиноз Маҷидова аз ҳизби ислоҳоти иқтисодии Тоҷикистон ва Саидиён Ҳикматуллоҳ Қувватзода аз Ҳизби демократии Тоҷикистон аз тарафи шахсони боэътимодашон муаррифӣ шуданд.
Ҳамчунин ҳар як номзад ба вакилӣ ба интихобкунандагон барномаи пешазинтихобии худро шинос намуда, ба саволҳо ҷавоб дод.