Намоиши гулҳои ороишӣ дар Хуҷанд

Хуҷанд, 10.03.2016. (АМИТ “Ховар”). -9 март дар Маҷмааи таърихию фарҳангии «Қалъаи Хуҷанд»-и маркази Суғд намоиш — чорабинии гулҳои ороишӣ доир гашт. Чорабинии мазкур бахшида ба ҷашни 25-солагии Истиқлолияти давлатии Ҷумҳурии Тоҷикистон ва ҳамчунин дар доираи барномаи вилоятии “Соли 2016 — соли маҳалла, деҳа ва шаҳраки обод” рӯи кор омада, ҳадафи он фароҳам овардани шароити мусоид барои рушди корҳои ободониву бунёдкорӣ дар шаҳру навоҳии вилоят ва ободу зебою гулзор гардонидани маҳал, шаҳраку деҳот ва муҳити атроф буд.
Дар намоиши гулҳо раиси вилояти Суғд Абдураҳмон Қодирӣ ва шаҳрдори Хуҷанд Раҷаббой Аҳмадзода, ҳамчунин шахсони масъули мақомоти маҳаллӣ, соҳибкорону гулпарварони вилоят ширкат намуда, аз навъҳои гуногуни гулҳои дар гулхонаҳои вилоят парваришшаванда дидан намуданд.
Раиси вилояти Суғд зимни шиносоӣ аз ҳадафи ташкили чорабинии мазкур ёдовар шуда, аз ҷумла гуфт, ки дар маркази вилоят омодагиҳо ба мавсими имсолаи гулкорӣ аз моҳи сентябри соли гузашта оғоз ёфта, бо ин мақсад як миллион пиёзаки гули лола харида, дар хиёбону гулгаштҳои шаҳри Хуҷанд шинонида шудаанд. Илова бар ин, дар қаларави вилоят гузаронидани фестивали лола ва маъракаи наврӯзӣ аз нақшаҳои мақомоти иҷроияи ҳокимияти давлатии вилоят дар соли равон мебошад.
Имрӯзҳо дар гулхонаҳои шаҳру ноҳияҳои вилоят беш аз 2,3 миллион дона гул парвариш мешавад, ки дар ин рӯз наздик ба 500 ҳазор гули гуногун ба намоиш-фурӯш гузошта шуд.