Рӯзи дарҳои кушод дар ДМИТ

Душанбе, 10.03.2016. (АМИТ «Ховар»).-Аз 4 то 10 марти соли равон дар Донишкадаи молия ва иқтисоди Тоҷикистон бо мақсади ҷалби ҳарчӣ бештари довталабон Рӯзи дарҳои кушод доир гардид.
Ба иттилои котиби масъули комиссияи қабули соли таҳсили 2016-2017 Меҳтар Содиқов дар ин маърака муҳассилин — хатмкунандагони муассисаҳои таҳсилоти миёнаи умумии пойтахт ва ноҳияҳои тобеи марказ иштирок намуданд. Барои довталабон гӯшаи махсус таъсис дода шуда, садорати факултаҳо дар бораи ихтисосҳои мавҷуда маълумот пешниҳод намуданд. Барои ҷалби довталабон ба ин маърака кормандони факултаҳо ва пахши эълон дар воситаҳои ахбори омма мусоидат намуданд. Довталабон аз синфхонаҳои компютерӣ, китобхона, хобгоҳ, толорҳои варзишӣ ва ошхона дидан карданд.
Тибқи нақшаи имсола донишкада ҳудуди ҳазор нафар донишҷӯро ба шуъбаҳои рӯзона ва ғоибона қабул менамояд. Таҳсилот дар шаклҳои рӯзона ва ғоибона аз рӯи дараҷаи бакалавр, мутахассис, магистр, доктор РHD, маълумоти дуюми олӣ, аспирантура ва докторантура роҳандозӣ мешавад.
Қобили зикр аст, ки имрӯз донишкада аз рӯи беш аз 37 ихтисос мутахассис омода месозад, ки бозори меҳнат воқеан ба чунин мутахассисон ниёз дорад.
Соли равон боз як ихтисоси дигар — иқтисодиёт ва идора дар корхонаи комплекси агросаноатӣ ба ин рӯйхат илова шуд.