Сафирони Тоҷикистон ва Юнон дар Русия масоили ҳамкории ду кишварро баррасӣ намуданд

Душанбе,04.03.2016 (АМИТ «Ховар»).- Вохӯрии сафири Тоҷикистон дар Федератсияи Русия Имомуддин Сатторов ва сафири Юнон дар Русия ва Тоҷикистон Данаи-Магдалини Кумануку дар Маскав доир гардид.
Бино ба иттилои Сафорати Тоҷикистон дар Русия, зимни мулоқот ҷонибҳо масъалаҳои рушд ва дурнамои муносибатҳои дуҷониба, аз ҷумла густариши ҳамкориро ҳам дар сатҳи ду ҷониб ва ҳам дар доираи созмонҳои байналмилалӣ муҳокима намуданд.
Инчунин ҷонибҳо сафари дарпешистодаи сафири Юнон ба Тоҷикистонро баррасӣ карданд. Сафири Юнон зикр кард, ки зимни сафари худ ба Душанбе як зумра вохӯриҳоро бо намояндагони расмии Ҳукумати Тоҷикистон, ки дар онҳо роҳҳои густариши ҳамкории мутақобилан судманд баррасӣ хоҳанд шуд, баргузор менамояд.