Вохӯрии Фарҳод Раҳимӣ бо Алтай Борубоев

Душанбе, 04.03.2016. (АМИТ Ховар). — 4-уми марти соли 2016 дар Раёсати Академияи илмҳои Ҷумҳурии Тоҷикистон вохӯрии президенти АИ ҶТ, академик Фарҳод Раҳимӣ, саркотиби илмии АИ ҶТ Абдусаттор Саидов, ноибони АИ ҶТ Кароматулло Олимов, Муҳиба Яқубова, директори Институти математикаи АИ ҶТ Зарулло Раҳмонов, академики АИ ҶТ Мирган Шаҳбозов бо ноиби президенти Академияи миллии илмҳои Ҷумҳурии Қирғизистон, академик Алтай Борубоев доир гардид.
Тибқи иттилои котиби матбуотии Академияи илмҳои Ҷумҳурии Тоҷикистон дар вохӯрӣ масъалаҳои ҳамкории байни ду кишвар дар соҳаи илм баррасӣ шуданд. Ҳамчунин дар бораи шӯроҳои диссертатсионии муштарак сухан гуфта шуд. Ҳоло байни давлатҳои Тоҷикистону Қирғизистон Шӯрои диссертатсионии байнидавлатӣ дар соҳаи экология фаъолият дошта, барои фаъолияти шӯроҳои нави диссертатсионӣ пешниҳодҳо манзур гардиданд.
Ҷонибҳо ба хулоса омаданд, ки байни Академияи илмҳои Ҷумҳурии Тоҷикистон ва Академияи миллии илмҳои Ҷумҳурии Қирғизистон созишномаи ҳамкорӣ ба имзо расонида шавад.