Вохӯрии Р. Раҳимзода бо ҳайати шахсии воҳидҳои таъйиноти махсуси ВКД

Душанбе, 31.03.2016. (АМИТ «Ховар»). -Дирӯз вазири корҳои дохилӣ Раҳимзода Рамазон Ҳамро ба қароргоҳи воҳидҳои таъйиноти махсуси Вазорати корҳои дохилӣ рафта, бо шароити хизматбарии ҳайати шахсии ин ниҳод аз наздик шинос гардид.
Р. Раҳимзода бо ҳолати омодабошии воситаҳои техникӣ ва шароити таъминоти моддӣ-маишии ҳайати шахсӣ ошноӣ пайдо намуда, барои беҳтар намудани шароити хизмат дар ин самт ба масъулини соҳа дастуру супоришҳои мушаххас дод.
Бояд гуфт, ки воҳидҳои таъйиноти махсуси ВКД имрӯзҳо бо тамоми шароити зарурии хизматбарӣ таъмин буда, барои тамрину таълими ҳайати шахсӣ биноҳои алоҳида ва синфхонаҳо бунёд гардидааст.
Зимни вохӯрии Р. Рамазон бо ҳайати шахсӣ вазир гуфт, ки ҳайати шахсии воҳидҳои таъйиноти махсуси Вазорати корҳои дохилӣ дар баробари дигар ҷузъу томҳои сохторҳои қудратии кишвар барои таъмини сулҳу оромӣ дар кишвар ва амнияти мардум саҳми арзандаи худро мегузоранд.
Дар вохӯрӣ як гурӯҳ кормандони воҳидҳои таъйиноти махсуси ВКД, ки зимни фаъолияти хизматиашон ба натиҷаҳои назаррас ноил гардидаанд ва барои интизоми намунавию хизмати софдилонаю содиқонаашон ба Ватан бо фармони вазири корҳои дохилӣ Раҳимзода Рамазон Ҳамро бо нишонҳои сарисинагӣ,медалҳои ҷашнӣ ва туҳфаҳои арзишнок қадрдонӣ гардиданд.