Ҳамоиши дастовардҳои занони деҳот дар КМТ

Душанбе, 23.04.2016 /АМИТ «Ховар»/.  Кумитаи кор бо занон ва оилаи назди Ҳукумати Ҷумҳурии Тоҷикистон ҷиҳати дар амал татбиқ намудани «Стратегияи миллии фаъолгардонии нақши занон дар Ҷумҳурии Тоҷикистон барои солҳои 2011-2020» дар якҷоягӣ бо ташкилоти ғайритиҷоратии байналмилалии «Наҷоти кӯдакон» дар Китобхонаи миллии Тоҷикистон ҳамоиши дастовардҳои занони деҳотро баргузор намуд.
Дар ҳамоиш  намояндагони Вазорати меҳнат, муҳоҷират ва шуғли аҳолии Ҷумҳурии Тоҷикистон, мақомоти иҷроияи маҳаллии ҳокимияти давлатӣ, занон аз шаҳру ноҳияҳои ҷумҳурӣ ва ҷомеаи шаҳрвандӣ иштирок намуда, барои баланд бардоштани нақши занон дар ҷомеа ва фаъол гардонидани онҳо, баланд бардоштани маърифати ҳуқуқии зан, инчунин иштироки васеи онҳо дар корҳои ҷамъиятӣ сухан гуфтанд.