Ҷавонон омодаи ҳифзи марзу буми кишвар

Душанбе, 8.04.2016 /АМИТ «Ховар»/. Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон баҳри баланд бардоштани ҳисси ватанпарастии ҷавонон дар ҳамкорӣ бо сохторҳои қудратии мамлакат баҳри даъвати баҳории ҷавонон ба сафи Қувваҳои мусаллаҳи кишвар дар тамоми гӯшаву канори ҷумҳурӣ чорабиниҳои гуногуни иттилоотиву маърифатӣ ва оммавию варзиширо баргузор менамояд.
Аз ҷумла, бо мақсади баланд бардоштани ҳисси худшиносию худогоҳӣ, ватандӯстӣ, ҳифзи марзу бум, Истиқлолияти давлатӣ ва ҳимояи арзишҳои миллӣ корҳои фаҳмондадиҳӣ вобаста ба даъвати баҳории ҷавонон ба сафи Артиш, роҳбарияти Кумита дар якҷоягӣ бо намояндагони сохторҳои ҳифзи ҳуқуқ ва ҷавонон дар шаҳру ноҳияҳои Қӯрғонтеппа, Сарбанд ва Бохтари вилояти Хатлон мулоқоту суҳбат анҷом доданд.
Дар ҷараёни вохӯриҳо аҳолӣ ва ҷавонон аз дастгириҳои пайвастаи Ҳукумати кишвар ва Пешвои миллат изҳори сипос намуда, омодагии худро баҳри хизмат ба халқу Ватан иброз намуданд.
Чунин мулоқоту вохӯриҳо дар дигар шаҳру ноҳияҳо идома доранд.