Ҷавонон – пайрави Асосгузори сулҳу Ваҳдати миллӣ – Пешвои миллат

Душанбе,21.04.2016/ АМИТ «Ховар»/. Дирӯз дар шаҳри Хоруғ — маркази ВМКБ Фестивали дӯстии ҷавонон таҳти унвони “Ҷавонон — пайрави Асосгузори сулҳу Ваҳдати миллӣ — Пешвои миллат, муҳтарам Эмомалӣ Раҳмон” бахшида ба Рӯзи ваҳдати миллӣ бо шукӯҳу шаҳомати хоса оғоз ёфт.

Дар он сокинони шаҳри Хоруғ бо рӯҳи болида ва идона ширкат карданд.

Аҳтам Абдуллозода, раиси Кумитаи ҷавонон, варзиш ва сайёҳӣ, ҷавононро таҳният гуфта, иброз дошт, яке аз усулҳои муттаҳидсозӣ, таҳкими рукнҳои дӯстӣ ва рушди фарҳангии ҷавонон ташкили фестивал ва форумҳои ҷумҳуриявӣ ва минтақавӣ мебошад. Дар натиҷаи ин чорабиниҳо садҳо ҷавони мамлакат аз фаъолияти якдигар, ҳаёту рӯзгори сокинони минтақаҳо ва урфу одати онҳо, таъриху тамаддун ва фарҳанги миллӣ огоҳ гардида, барои табодули таҷриба имкон пайдо мекунанд.

— Набояд фаромӯш кард, ки доир намудани чунин фестевалҳо имкон медиҳад, ҷавонони касбу кори гуногун дар як муҳит ва атрофи як масъала, яъне муттаҳидӣ, дӯстӣ ва ваҳдат ҷамъ омада, бурду бохт ва дастовардҳои худро барои ҳам қисса намоянд ва намунаи ибрати дигарон бошанд, — афзуд Аҳтам Абдуллозода.