Боздошти шаҳрванд дар фурудгоҳ бо 30 000 $

Душанбе, 16.04.2016 /АМИТ «Ховар/. Дар «Фурудгоҳи байналмилалии Душанбе» аз ҷониби кормандони мақомоти гумрук ва Прокуратураи нақлиёти кишвар шаҳрванди Ҷумҳурии Тоҷикистон С. А. Х. ҳангоми бо худ бурдани 30 ҳазор доллари амрикоӣ ба хориҷи кишвар зимни парвоз дар хатсайри Душанбе-Урумчӣ боздошт гардид.
Ин амал зимни гузаронидани санҷиши такрорӣ дар «Фурудгоҳи байналмилалии Душанбе» оид ба ҳолати иҷрои қонунгузории танзими асъор ошкор гардидааст.
Дафтари матуботи Хадамоти гумруки назди Хукумати ҷумҳурӣ итттилоъ медиҳад, ки доир ба ин амали ғайриқонунии шаҳрванд С.А.Х аз ҷониби Прокуратураи нақлиёти Тоҷикистон парвандаи ҷиноятӣ боз карда шуда, тафтишот идома дорад.
Бояд тазаккур дод, ки шаҳрвандони Ҷумҳурии Тоҷикистон дар мавриди интиқоли асъори хориҷӣ ба хориҷи мамлакат ҳуқуқ доранд то 3 ҳазор долларро интиқол диҳанд. Дар сурати аз ин бештар бо худ пул доштан ва ё интиқоли он ба хориҷи мамлакат бояд онро ба расмияти гумрукӣ дароранд ва дар он мақсади интиқолу бо худ бурдани пул мушаххас гуфта шавад. Ин талабот ба шаҳрвандони хориҷӣ низ дахл дорад.